Internet тармоғида тарқалган видеода номаълум шахс бошқа бир кишини куч билан ушлаб туриб, тармоқ фойдаланувчиларига бу шахс йўл ҳаракати қоидабузарликларини тасвирга олиб, ички ишлар органларига жўнатиш билан шуғулланишини маълум қилган. Бу ҳақда ИИББ ҳолат юзасидан  маълумот берди.

Аниқланишича, ушбу ҳолат 2021 йил 1 октабр куни соат 17:00 да Учтепа тумани Тошкент халқа автомобил йўлида «Ўрикзор» бозори яқинида содир бўлган. Ҳуқуқбузар 1996 йилда туғилган Хуршид Е. еканлиги аниқланган.

Хуршид Е. Учтепа тумани ИИО ФМБ 3-сон ички ишлар бўлимига етказилиб, у билан профилактик суҳбат ўтказилган. Бундан ташқари, унга нисбатан Ўзбекистон Республикаси Маъмурий жавобгарлик тўғрисидаги кодексининг 183-моддаси бўйича баённома расмийлаштирилган.

Тўпланган ҳужжатлар қонуний чора кўрилиши учун судга юборилган.