Сурхондарёда гиёҳванд моддаларни ичига ютиб, олиб кирмоқчи бўлганлар қўлга олинди - YANGILIK .RU yangilik.ru
  • Chor. Iyul 6th, 2022

YANGILIK .RU

АХБОРОТ ПОРТАЛИ

Сурхондарёда гиёҳванд моддаларни ичига ютиб, олиб кирмоқчи бўлганлар қўлга олинди

Сурхондарё вилоятида ўзидан жонли контейнер сифатида фойдаланиб, гиёҳвандлик воситаларини ички аъзоларига яширганча олиб киришга бўлган бир нечта уринишлар фош қилинди.Бу хақда божхона қўмитаси ахборот хизмати маълум қилди

Сурхондарё вилояти божхона бошқармаси «Айритом» чегара-божхона постига пиёда равишда кириб келган қўшни давлат фуқаро Т.С. инсон танасини сканерловчи қурилма кўмагида божхона кўригидан ўтказилганида, унинг ички аъзоларида юмалоқ шаклдаги шубҳали предметлар борлиги маълум бўлди.

Шундан сўнг шифокорлар кўмагида ушбу шахснинг ичидан 44 дона полиэтилен ўрамлар чиқариб олинди. Мазкур ўрамларга соф оғирлиги салкам 430 гр.ни ташкил қилувчи “опий” гиёҳвандлик воситаси яширилган экан.

Хабарга кўра , “Айритом” чегара божхона постига пиёда равишда кириб келган қўшни мамлакат фуқароси Қ.К. ҳам тезкор кузатувга олинди ва сканер қурилмаси кўмагида кўздан кечирилди. Натижада, ушбу шахснинг ичида ҳам 34 дона скотчланган ўрамлар борлиги фош бўлди.

Тиббиёт ходимлари иштирокида чиқариб олинган мазкур ўрамлар текшириб кўрилганида эса, уларнинг ичида салкам 650 гр. “гашиш” гиёҳвандлик воситаси борлиги фош бўлди.

Орадан бироз ўтиб, мазкур постга кириб келган фуқаро Қ.Н.ни ҳам ўзидан олдинги шерикларининг қисмати кутаётган эди.

У ҳам ички аъзоларига наркотик моддаларни яширгани бир зумда “Боди сканер” қурилмаси кўмагида фош қилинди. Бу гал 31 дона ўрамлар учун “жонли контейнер” вазифасини ўташга уринган шахс 592,22 гр. “гашиш” гиёҳвандлик воситасини шу зайлда олиб ўтмоқчи бўлган.

Шундан сўнг тезкор тадбирлар Тошкент шаҳрида ҳам давом эттирилиб, пойтахт меҳмонхонларидан бирида мазкур наркотик моддаларни қабул қилиб олиши керак бўлган шахс ҳам қўлга олинди.

Ўтказилган тезкор тадбирлар натижасида жами 1672,22 грамм оғирликдаги гиёҳвандлик воситаларининг ноқонуний айланмасига чек қўйилди.

Ушбу ҳолат юзасидан божхона органлари томонидан жиноят иши қўзғатилиб, тергов ҳаракатлари давом эттирилмоқда

110